Category Archives: மதியுரை என்றால் சும்மாவா

உளப் பாதிப்புக்களிலிருந்து விடுபட நீங்கள் கூறும் மதியுரை என்ன?

குழந்தை தொடக்கம் கிழம் வரை ‘மக்கள்’ என்ற குழுவின் ஓர் உறுப்பினராகவே வாழ்கின்றோம். இங்குக் கருத்து முரண்பாடு, அடிபிடி கலகம், திட்டித் தீர்த்தல், ஒதுக்கி வைத்தல் எனப் பல நிகழலாம். இதனால் ஒருவரது உள்ளம் பாதிக்கப்படலாம். இதற்கு உங்கள் தெரிவு மருந்தாகட்டும்.

பாதிப்புற்றவரின் விருப்புக்கு அதாவது சூழலால் ஏற்கக்கூடிய ஒன்றுக்கு ஒத்துழைத்து அன்பாக அரவணைத்தல்.

புதிய சூழலுக்குள் புதிய உறவுகளுடன் விரும்பியவாறு வாழ வழிவிடுதல்.

நன்மை தரும் முயற்சிகளுக்குக் குறுக்கே நிற்காமல் ஊக்கமளித்தல். புதிய உறவுகளை மேம்படுத்த இது உதவும்.

வெறுக்கும் உறவுகளைச் சந்திக்க விடாமலும் விருப்பம் இல்லாதவற்றைத் திணிக்காமலும் விரும்பாத நிகழ்வுகளுக்கு அனுப்பாமலும் பேணுதல்.

உளநல மருத்துவரின் மதியுரைப்படி நெருங்கிய உறவுகளில் ஒருவராக அணைத்து நல்லுறவைப் பேணுதல்.

நீங்கள் உங்கள் உளநல மதியுரைகளைப் (ஆலோசனைகளைப்) பின்னாட்டமாக இங்கே இடலாம். தங்கள் உளநல மதியுரைகளை நானும் எதிர்பார்த்துக் காத்திருக்கிறேன்.

Advertisements

பணம் பண்ணலாம் வாங்க!

பணம் பண்ணலாமோ?
எங்கையப்பா
அரசின்
பணம் அச்சடிக்கும் பொறியைக் களவெடுத்தனி?
பணம் பண்ணலாம் வாங்க என்றதும்
ஆளுக்காள்
இப்படிக் கேள்விக் கணைகளை
என் மீது ஏவிவிட்டனர்!
இத்தனைக்கும்
முகம் கொடுக்க முன்
பணம் பண்ணலாம் வாங்க என்றதும்
என்னைச் சூழ்ந்து கொண்ட
ஆட்களைக் கட்டுப்படுத்த முடியவில்லை!
பணம்
வாழ்க்கைக்குத் தேவை தான்
பணத்தைத் தேடும் வழி தான்
சரியானதாக இருக்க வேண்டுமே!
பணம் அச்சடிக்கும் பொறியை
அறிமுகம் செய்ய
நானொன்றும் பொறியியலாளரல்ல…
பணத்தைத் தேடும் வழியைச் சொல்லும்
மதியுரைஞர்(ஆலோசகர்) என்றதும்
கால் பங்கு கூடியோர்
ஓடி ஒளிந்தனர்!
பணத்தைத் தேடும் வழிகளில்
முதல் வழி கல்வி தான்…
விரும்பிய எல்லாவற்றையும்
கற்றுக்கொள் என்றதும்
கால் பங்கு கூடியோர்
ஓடி ஒளிந்தனர்!
பணத்தைத் தேடும் வழிகளில்
இரண்டாம் வழி சொத்துகள் தான்…
உழைத்த பணத்தை
நெற்காணி, வீட்டு நிலம் என்றும்
வீடுகள், கடைகள் என்றும்
வேண்டிக் கட்டி வைப்பதே என்றதும்
கால் பங்கு கூடியோர்
ஓடி ஒளிந்தனர்!
கல்வியும் தேடியாச்சு என்றாலும்
சொத்துகளும் தேடியாச்சு என்றாலும்
பணத்தைத் தேடும் வழிகளில்
மூன்றாம் வழி தான் முக்கியம்
அது தான்
முதலிரண்டையும்
முகாமைத்துவம் செய்யும் ஆளுமை என்றதும்
எஞ்சிய கூடி நின்றோரில்
அரைப் பங்கினர் ஓடி ஒளிந்தனர்!
பணம் பண்ணலாம் வாங்க என்று
வரச் சொல்லிப் போட்டு
“கல்வியா? செல்வமா? வீரமா?” என்று
திரைப்படமொன்றில சிவாஐி கேட்க
கல்வியும் செல்வமும் இருந்தால் போதாது
அதுகளைக் கையாளத் தெரிவது தான் வீரமென
திரைப்படமொன்றில எம்ஐிஆர் சொன்னதை
சொல்ல வந்திட்டியளே என்று
கூடி நின்ற எஞ்சியோரும்
ஓடி ஒளிய நாலு ஆள் நின்றனரே!
ஏனங்க
நீங்க நாலு ஆளும்
ஓடி ஒளியாமல் நிற்கிறியள் என்றதும்
நாமும் உங்களைப் போன்ற
மதியுரைஞர்(ஆலோசகர்) தானுங்க…
ஏதாவது உதவுங்க;
எல்லோரும்
உங்களைச் சுற்றிக் கூடி நிற்பாங்க…
கட்டிப் பிடிச்சுக் கொஞ்சுவாங்க…
உங்கட நிழல் போல
ஒட்டிக் கொண்டும் வருவாங்க…
ஆனால்
இலவசமாகக் கிடைக்கும்
மதியுரையை(ஆலோசனையை) கேட்க
வரமாட்டாங்கள் என்று சொல்லவே
கால் கடுக்கக் காத்து நின்றோம் என்றனர்!
சொல் திறமை(புத்தி) கேட்காட்டிலும்
தன்(சுய) திறமை(புத்தி) இருந்தாலும் சரி
பட்டுத் தெளிந்தாலும் சரி
ஒவ்வொருவரும் வெல்லலாம் தானே…
மதியுரை(ஆலோசனை) என்பது
ஒவ்வொரு வெற்றியையும்
நம்பிக்கையுடன் விரைவில் பெற
உதவும் பொறி(கருவி) என்று கூறி
நானும் அந்நால்வரும் கலைந்தோம்!

குறிப்பு: உளநல மதியுரை(ஆலோசனை-Counselling) என்பது நோய் நெருங்காமல் முற்காப்பு எடுக்க மட்டுமல்ல, ஒவ்வொரு வெற்றியையும் நம்பிக்கையுடன் விரைவில் பெறவும் பாவிக்கலாம். பிறர் சொல்வதை இடது காதாலே வேண்டி வலது காதாலே வெளியில விடுங்கோ; அதற்குமுன் நன்மை தரும் நல்லெண்ணங்களை மூளையில்(உள்ளத்தில்) பதிவு செய்யுங்கள்.

ஆறுதலுக்கான ஆற்றுப்படுத்தல்

வாழ்வில் தலைநிமிர்ந்தோருக்குத் தான்
பெற்றோரின் பெறுமதி தெரியும்
படித்துப் புகழீட்டியவருக்குத் தான்
படிப்பின் பெறுமதி தெரியும்
வெற்றி பெற்றோருக்குத் தான்
உறவுகளின் பெறுமதி தெரியும்
வைப்பில் வைத்திருந்தவருக்குத் தான்
உழைப்பின் பெறுமதி தெரியும்
கெட்டுப்பட்டு அறிந்தவருக்குத் தான்
பாதிப்பின் பெறுமதி தெரியும்
இழப்புகளை எதிர்கொண்டவருக்குத் தான்
இழப்பின் பெறுமதி தெரியும்
ஆறுதலுக்கான ஆற்றுப்படுத்தல் என்பது
பெறுமதி தெரியாத வரை
நிறைவேற்ற இயலாத ஒன்றே!
தாயை இழந்த பிள்ளைக்கும்
தந்தையை இழந்த பிள்ளைக்கும்
வெவ்வேறு துயர் தான்…
கணவனை இழந்த மனைவிக்கும்
மனைவியை இழந்த கணவனுக்கும்
வெவ்வேறு துயர் தான்…
காதலனை இழந்த காதலிக்கும்
காதலியை இழந்த காதலனுக்கும்
வெவ்வேறு துயர் தான்…
பிள்ளையை இழந்த பெற்றோருக்கும்
உறவுகளை இழந்த உறவினருக்கும்
வெவ்வேறு துயர் தான்…
ஆனால்
வாழ்க்கை என்னும் வட்டத்தில்
பிறப்பும் இறப்பும்
இணைந்திருக்கும் இரண்டே!
இயற்கையை
எதிர்க்க முனைவதை விட
இயற்கையுடன் இசைந்து போவதே
நன்றாயினும்
முயற்சி உள்ள வரை
முயன்று பார்க்கலாம் என்பது
எளிமையான ஆற்றுப்படுத்தலே!
உண்மையை
மூடிவைக்க இயலாதது போல
துயரின் பெறுமதி
பாதிப்புற்றவரின் நலத்தில் தெரியும்…
உள்ளத்தில் இருப்பதை
கொஞ்சம் இறக்கி வைத்தால்
பாதிப்பின் பெறுமதியை
கொஞ்சம் பகுத்தறிய இயலும்…
வாழ்க்கை என்பது
எமக்குத் தரப்பட்ட ஒன்று
அதனை
வேண்டாமென வீசிக்கொள்ள
எமக்கு உரிமை இல்லைப் பாரும்…
இயற்கையுடன் இசைந்து
எமக்குக் கிடைத்த வாழ்வை
அணைத்துக் கொண்டு வாழ்வதே
எமது பணியாக வேண்டும் என்பதே
ஆறுதலுக்கான ஆற்றுப்படுத்தல் என்பேன்!