Monthly Archives: ஏப்ரல் 2013

உளவியல் நோக்கில் முதல் உறவு

வாழ்வில் வகுப்பு மாணவராக, நண்பராக, நண்பியாக, காதலியாக, காதலனாக, கணவராக, மனைவியாக எனப் பல வழிகளில் உறவுகளைத் தொடருகிறோம். அவ்வுறவுகளின் முதல் நாள் பழக்கமே, வாழ் நாளில் நெருங்கிப் பழகவோ விலகிச் செல்லவோ இடமளிக்கிறது.

முதற் சந்திப்பிலேயே முதற் பேச்சிலேயே உண்மையைக் கூறி உறவாடியோரை மறக்க முடியவில்லை.

நல்லவராக நட்பாகிய பின் நாள்கள் ஓட ஓட கெட்ட முகத்தைக் காட்டியோரை மறக்க முடியவில்லை.

நட்பாகப் பழகிய பின் நாள்கள் ஓட ஓடக் காதலிக்கலாமே என்று கதை போட்டோரை மறக்க முடியவில்லை.

நட்பாகப் பழகிய பின் நாள்கள் ஓட ஓட நெருங்கிப் பழக ஒரே இலையில் உண்டு ஒரே பாயில் படுத்தெழும்பிய நிலையில் நண்பரெனச் சொல்லாமல் உடன் பிறவா உறவாகப் (ஒரு தாய் பிள்ளைகளாக) பழகியோரை மறக்க முடியவில்லை.

பிழைகளைக் கண்டு சுட்டிக்காட்டி, அதனைத் திருத்தி உதவி எம்மை முன்னேற்ற உதவியோரை மறக்க முடியவில்லை.

என் இழி நிலை கண்டும் என் வறுமை கண்டும் காதலிப்பதாகப் பழகியோரை மறக்க முடியவில்லை.

காதல் எண்ணத்தோடு பழகி, மணமானவரெனத் தெரிந்ததும் நண்பராக மாறித் தொடர்ந்து நட்பைப் பேணுவோரை மறக்க முடியவில்லை.

அளவுக்கு மீறிப் பழகியும் கற்புக்குக் கேடு வரமால் (பாலியல் நோக்கிலான தவறுகளைச் செய்யாமல்) பண்பாட்டைப் பேணியோரை மறக்க முடியவில்லை.

எனக்கும் தகுதி உண்டென, எனது கருத்துகளைப் பொருட்படுத்தி, என் மதியுரையைப் பெற நாடியோரை மறக்க முடியவில்லை.

துயருற்றாலும் முன்பின் தெரியாத முகங்களாக இருந்தும் முன்வந்து உதவியோரை மறக்க முடியவில்லை.

மணமாகிய பின்னும் என் நல்லது கெட்டதுகளைப் படித்தும் என்னை மணமுறிவு(Divorce) கேளாமல் வாழும் என் மனைவியை மறக்க முடியவில்லை.

தன் வாழ்வில் தான் காதலித்துக் கற்பிழந்த உண்மையைக் கூறியும் தன்னை மணமுடித்து வாழும் தன் கணவரை மறக்க முடியவில்லை எனத் தோழி ஒருத்தி சொன்னாள்.

இப்படி ஆளுக்காள் மறக்க முடியாத, உள்ளத்தை விட்டு அகலாத உண்மைகளாகப் பல நிகழ்வுகளும் ஆள்களும் இருக்கத் தான் செய்யும். இதற்கு முதல் நாள் பழக்கமே அடிப்படைக் காரணமாக அமைந்து விடுகிறது.

உளவியல் நோக்கில் முதல் உறவுவைச் சிந்தித்துப் பார்ப்போம். முதல் உறவுவிலேயே எமக்கு விருப்பம் ஏற்பட்டதும் அவ்வுறவைப் பேணவே விரும்புகிறோம். எடுத்துக்காட்டாக:

1. வகுப்பில் கணக்குத் தெரியாமல் ஆசிரியரிடம் அடி வாங்கியதைக் கண்டு உள்ளம் இளகிக் கணக்குச் சொல்லித் தந்த வகுப்பு மாணவரை முதல் நாளிலேயே பிடித்துப் போகிறது.

2. வழியிலே சந்தித்த ஒருவர் எதிர்பாராமல் பழகினாலும் தான் எவ்வகையில் கெட்டவர், தான் எவ்வகையில் நல்லவர் எனத் தன்னைப் பற்றிய உண்மைகளைச் சொன்னதும்; சிலருக்கு அவரை நண்பராகவோ நண்பியாகவோ ஏற்றுக்கொள்ள விருப்பம் வரலாம்.

3. நோயுற்ற வேளை அல்லது சிக்கலில் மாட்டிக்கொண்ட வேளை ஒருவருக்கு ஒருவர் உதவியிருக்கலாம். அவ்வுதவி உதவி பெற்றவருக்கு உதவியவரை அடிக்கடி நினைக்கத் தூண்டும்; அடிக்கடி பழகத் தூண்டும்; அதுவே காதல் மலர வைக்கும். ஆயினும், ஒழுக்கமாகப் பழகிய முதற் சந்திப்போ முதற் பேச்சோ அக்காதல் மலர உதவி இருக்கலாம். இதுவே சிலருக்கு ஒருவரை காதலியாகவோ காதலனாகவோ ஏற்றுக்கொள்ள விருப்பம் வரலாம்.

4. பெற்றோர் விருப்பப்படி கலியாணம் பேசிச் செய்தாலும், ஒருவரை ஒருவர் முன்கூட்டி அறிய வாய்ப்பிருக்காது. முதலிரவில் ஒருவருக்கு ஒருவர் தம்மைப் பற்றிக் கூறி முடிக்கவே பொழுது விடிந்துவிடும். ஆயினும், அவரவர் தம் உண்மைகளைப் பரிமாறியதும் விருப்பம் மேலிடலாம். இதுவே நெடுநாளைக்குக் கணவராக, மனைவியாக வாழவைக்க உதவுகிறது.

மேற்படி நான்கு நிலைகளில் உளவியல் நோக்கில் முதல் உறவுவைச் சிந்தித்துப் பார்த்தோம். ஒருவர் தமக்கெனச் சில வரையறைகளை, எதிர்பார்ப்புகளை உள்ளத்திலே வைத்துப் பேணியிருப்பர். இவ்வாறான முதல் உறவிலேயே (அதாவது முதற் சந்திப்பிலேயே முதற் பேச்சிலேயே) உள்ளத்திலே பேணிய ஒருவரது வரையறைகளையும் எதிர்பார்ப்புகளையும் நிறைவு செய்யும் வகையில் அடுத்தவர் செயற்பட்டால் அவ்வடுத்தவர் மீது அவருக்கு விருப்பம் ஏற்படுகிறது. முதல் உறவில் ஏற்பட்ட இவ்விருப்பமே தொடர்ந்தும் உறவைப் பேண உதவுகிறது.

ஆயினும், முதல் உறவில் ஏற்பட்ட இவ்விருப்பத்திற்கு எதிராக அடுத்தவர் செயற்பட்டால் குறித்த ஆளால் அதனைத் தாங்கிக்கொள்ள முடியாமல் போகிறது. இதனால், நிலையான பிரிவும் ஏற்படுகிறது. மறக்க முடியவில்லை, மறக்க முடியவில்லை என நான் குறிப்பிட்டது; இவ்வாறு இணைந்தவரையோ பிரிந்தவரையோ உள்ளத்தில் மீட்கக் கூடியதாக இருப்பதனாலேயே!

முடிவாகச் சொல்வதானால் முதல் உறவிலேயே உங்கள் நல்லது கெட்டதுகளை சுருக்கமாகத் தெளிவாகச் சொல்லிப் போடுங்கோ! உங்களைப் பிடித்திருந்த எவருக்கும் அவை நம்பிக்கையூட்டும். அதேவேளை அவற்றை அதாவது உங்களைப் பிடித்தவருக்கு
ஏற்படுத்திய விருப்பத்தைத் தொடர்ந்து பேணவேண்டும். அப்போது தான் முதல் உறவிலேயே உருவாகிய உறவுகளைப் பிரியாமல் பேணமுடியும்.

உளவியல் நோக்கில் காதல்

உளவியல் என்றால் என்ன?
உள்ளம்(மனம்) பற்றிய அறிவியல்.
அப்படியாயின், உள்ளம்(மனம்) என்றால் என்ன?
மூளை இயங்கும் செயலை உள்ளம்(மனம்) என்று ஒப்பிடுகிறார்கள். எனவே, உள்ளம்(மனம்) என்றால் மூளையுடன் தொடர்புடையது.
இனி, காதல் என்றால் என்னவென்று தெரியுமா?
அதுதானே, இதுவரை வரையறுத்துக் கூற முடியாதுள்ளது. ஆயினும், மூளையில் சுரக்கப்படும் ஓமோனின் தூண்டுதலால் ஏற்படும் நடத்தை மாற்றமே காதல் என அறிவியலாளர்கள்(விஞ்ஞானிகள்) கூறுகிறார்கள்.

ஒக்சிரோசின்(Oxytocin Hormone) என்னும் ஓமோன் மூளையில் சுரப்பதால் தான் தாய்-பிள்ளை உறவில் அதிக அன்பு ஏற்படுகிறது. இதுவே காதல் ஓமோன் என்றும் அழைக்கப்படுகிறது. (ஆயினும், பாலுறவில் மகிழ்வு மற்றும் பிரசவலி ஆகியவற்றுடன் இதற்குத் தொடர்பு உண்டாம். மேலதீகத் தகவலை மருத்துவரிடம் கேட்டுப்பெறவும்.)

எப்போது அந்தக் காதலைத் தூண்டும் ஓமோன் சுரக்கும் என்ற கேள்வி எழுகிறது, அதற்கு உளவியல் நோக்கில் தான் விடை காண வேண்டியுள்ளது.

இருவருக்கிடையே காணப்படும் உறவுமுறைக்கு அவர்களது உள்ள(மன)த்தில் உள்ள விருப்பு வெறுப்புகளே காரணமாக அமைகின்றது, வெறுப்பு அதிகம் என்றால் பிரிவும் விருப்பு அதிகம் என்றால் நெருக்கமும் இருவருக்கிடையேயான உறவுமுறையில் காணப்படுகிறது.

அப்படியாயின் காதல் எப்படி அமையும். காதல் என்பது அளவு கடந்த அன்பு என்றும் சொல்லலாம். இருவருக்கிடையேயான நெருக்கமான உறவுமுறையில் ஏற்படும் அளவு கடந்த அன்பு தான் காதல் என்று வரையறுக்கப்பட வேண்டியுள்ளது. இந்நிலையில் தான் காதலைத் தூண்டும் ஓமோன் மூளையில் சுரக்கும் என்று கூறலாம். சரி, ஒருவர் இன்னொருவர் மீது அதிக விரும்பம் கொள்ள மூளையில் சுரக்கும் ஓமோன் மட்டும் காரணமாக அமையாது.

ஒருவரது எதிர்பார்ப்புகள் இன்னொருவரது எதிர்பார்ப்புகளுடன் பொருந்தும் நிலை, ஒருவர் இன்னொருவர் மீது காணப்படும் சிறப்பு நடத்தைகளில் கொண்டுள்ள நாட்டம், எதிர்ப் பால் ஈர்ப்பு எனப் பல காரணங்களால் ஒருவர் இன்னொருவர் மீது அதிக விரும்பம் கொள்ளலாம். அந்த விரும்பம் தான் ஒருவர் இன்னொருவர் மீது அதிக அன்பு செலுத்தக் காரணமாக அமைந்து விடுகிறது. அந்த அன்பு தான் ஒருவர் இன்னொருவர் நலனில் அக்கறை காட்ட இடமளிக்கிறது. இந்த அக்கறை ஏற்பட மூளையில் சுரக்கும் ஓமோனும் ஒரு துணைக் காரணமாகலாம்.

இந்த அக்கறை பணம், பொருள், ஏற்ற இறக்கம், உயர்வு தாழ்வு, ஏழை பணக்காரர், திருமணமானவர் திருமணமாகாதவர், அகவை(வயது) எதனையும் பொருட்படுத்தாது ஒருவர் உள்ளத்தில் ஏற்படலாம். இந்த அக்கறையை அடுத்தவர் பொருட்படுத்தாவிடின் ஒரு தலைக் காதல் என்றும் அடுத்தவர் பொருட்படுத்தினால் இரு தலைக் காதல்(இருவராலும் ஏற்றுக்கொள்ளப்பட்ட காதல்) என்றும் சொல்லப்படுகிறது.

காதலுக்குக் கண்ணில்லை என்பதில் உண்மை இருக்கத்தான் செய்கிறது. ஒருவர் இன்னொருவர் நலனில் காட்டும் அக்கறைக்கு எது குறுக்கே வந்தாலும் அவ்வக்கறை குறைந்து விடுவதில்லை. அடுத்தவர் மீது அளவு கடந்த அன்பு அல்லது அடுத்தவர் நலனில் அக்கறை காரணமாக குறுக்கே வரும் எதுவும் பெரிதாகத் தென்படுவதில்லை. இதனால் தான் காதலுக்குக் கண்ணில்லை என்று சொல்லத் தோன்றுகிறது.

பாலியல் ஈர்ப்பால் சிலர் காதலை வரவழைக்க முயற்சிக்கிறார்கள். அம்முயற்சி கூட காதல் அமைய இடமளித்தால் அதுவும் ஒருவரது கண்ணை மறைக்கலாம். அதாவது, பாலியல் உந்துதலால் பாலியல் தேவைகளை அடைய மட்டும் தேனொழுக அன்பாகப் பழகுவர். அதனை உண்மையான அன்பு என நம்பி; ஒருவர் தேவையை ஒருவர் நிறைவு செய்ய உடன்படலாம். இறுதியில் தன் தேவையை நிறைவு செய்தவர் பிரிந்துவிடுவார்(சிலர் பணம், பொருள், பொன் எனத் திரட்டிய பின்னும் பிரிவர். அப்படியானவர்களின் நடிப்பிலும் பலர் பாதிப்படைவர்). பாலியல் உந்துதலால் பாலியல் தேவைகளை அடைய முனைந்தவரின் அன்பைக் காதலென நம்பி ஏமாந்தவரின் பாதிப்புகளை நீங்கள் அறிந்திருப்பீர்கள்.

தொடக்கம் பாலியல் ஈர்ப்பாக இருந்தாலும் முடிவு நம்பிக்கையான காதலாகவும் அமையக்கூடும்.

ஒருவரது அழகிற்கும் பிறரை ஈர்க்கும் உடலமைவிற்கும் பாலியல் ஓமோன்கள் உதவுகின்றன. எடுத்துக்காட்டாகப் பெண்களுக்கு ஈஸ்ட்ரோஜென்(Estrogen Hormone)ஓமோன் மார்பழகையும் மென்மையான இனிய குரலையும் அதிக பெண்ணியல் நடத்தைகளையும் ஏற்படுத்த உதவும். இதேபோன்று ஆண்களுக்கு டெஸ்டாஸ்டேரோன்(Testosterone Hormone)ஓமோன் எடுப்பான, மிடுக்கான, பலமான உடற்கட்டோடு, வன்மையான குரலையும் அதிக ஆணியல் நடத்தைகளையும் ஏற்படுத்த உதவும். ஆயினும், ஆண்களிற்கு ஈஸ்ட்ரோஜென்(Estrogen Hormone)ஓமோனும் சுரக்கப்படுவதால்; டெஸ்டாஸ்டேரோன்(Testosterone Hormone)ஓமோனை விட இதன் வீதம் அதிகம் எனின் அவ்வகை ஆண்கள் இனிய குரலையும் பெண்ணியல் நடத்தைகளையும் கொண்டிருப்பர்.

பெண்களிலுள்ள அன்ட்றோஜன்(Androgen Hormone)ஓமோன் ஆண்களை விரும்பத் தூண்டுகிறதாம். ஆண்களிலுள்ள அன்ட்றோஜன்(Androgen Hormone)ஓமோன் பெண்களை விரும்பத் தூண்டுகிறதாம். அதாவது, பாலியல் எண்ணங்கள் தோன்ற இவர் ஓர் ஊக்கி. இதனால் பாலியல் ஈர்ப்பு ஏற்படுகிறதாம். இதற்கு ஈஸ்ட்ரோஜென், டெஸ்டாஸ்டேரோன் ஓமோன்களால் அமைந்த உடலமைப்பும் துணைநிற்கிறதாம்.

ஆயினும், உளவியல் நோக்கில் எதிர்ப் பால் ஈர்ப்பு(கவர்ச்சி) என்று அழைக்கின்றோம். எடுத்துக்காட்டாக
“எந்தப் பெண்ணிலும் இல்லாத ஒன்று – அது
உன்னிடம் இருக்கிறதே – அதை
அடையாமல் விடாமாட்டேன்” என்றொரு திரைப்பாடல் அடிகளை நினைவூட்டினால் புரியும். இதே பாடல் அடியை “எந்த ஆணிலும் இல்லாத ஒன்று” என்று மாற்றியும் படிக்கலாம். இதுவே அதாவது இவ்வாறான எண்ணங்களே உளவியல் நோக்கில் எதிர்ப் பால் ஈர்ப்பு(கவர்ச்சி)க்கு அடித்தளமாகக் காணப்படுகிறது.

இவ்வாறான எதிர்ப் பால் ஈர்ப்பு சக்தியே ஆணையும் பெண்ணையும் பழகத் தூண்டுகிறதாம். இவ்வாறு பழகுவோர் நீண்ட நாள் தமது விருப்புகளைத் தேக்கி வைத்திருந்தாலும் சூழல் இடமளிக்கையிலே சூழலுக்கு அஞ்சிப் பழகத் தொடங்குவர். இதனால் இவர்களது பழக்கம் அதாவது அன்பு வைத்துப் பழகுதல் இயல்பாகவே தொடரும். இது நாளடைவில் நம்பிக்கை தர உறுதியான காதலாக மாறிவிடும். இனியென்ன, சூழலுக்கு ஏன் அஞ்சவேணும் எனத் துணிந்தவர்கள் தங்கள் காதலை வெளிப்படுத்தி வென்றிடுவர். சூழலுக்கு அஞ்சி காதலை வெளிப்படுத்த நல்ல நேரம் பார்த்துக் கொண்டிருப்போர் நிலை ஒரு தலைக் காதலாகவே அமைகிறது.

ஓமோன்களின் தூண்டலால் காதல் அமைவதால் கண்ணை மறைக்க இடமிருந்தாலும் உறுதியான உள்ளத்தைக் கொண்டவர்கள் தங்கள் தொலைநோக்குப் பார்வையால் தமது மகிழ்வான வாழ்வை அமைப்பதோடு; தமக்கும் காதலுக்கும் உரிய மதிப்பைப் பெற்றுக் கொடுக்கிறார்கள் என்பது உண்மையே!

எஞ்சியோர் ஏதோ ஒரு வழியில் பாதிப்பையோ கெட்ட பெயரையோ பெறலாம், அதேவேளை முறையற்ற வாழ்க்கையையும் அமைத்துக் கொள்ளலாம்.
சில எடுத்துக்காட்டுகள்:
சகோதர உறவுக் காதல்
அதிக அகவை(வயது) வேறுபாட்டுக் காதல்
மணமுடித்தவர்-மணமுடிக்காதவர் காதல்
துணைவர் இருக்கையில் அடுத்தவரோடு காதல்
இவ்வாறு நமது சூழலில் பல இருக்கலாம்.

காதலுக்கு அகவை, துணைவன்(கணவன்)/துணைவி(மனைவி), ஏழ்மை, பணம், எனப் பல இருந்தாலும், அதனையும் தாண்டி விரும்பம் மேலிட காதல் தன் வேலையைக் காட்டும் என்பது உண்மைதான். அதற்காக மனித ஒழுக்கத்தை, மக்களாய(சமூக) வேலியை மீறிக் காதலித்தல் அறிவுடைய செயலல்ல.
எடுத்துக்காட்டாக
மணமுடித்த(தனது துணைவர் இருக்கக் கூடியதாக) பெண்ணோ ஆணோ மணமுடிக்காத ஒருவரைக் காதலிப்பது அறிவுடைய செயலல்ல என்பேன். இங்கு எதிர்ப் பால் ஈர்ப்பு(கவர்ச்சி) முதலிடம் பிடிக்க; தொலைநோக்குப் பார்வைக்கு இடமில்லாமல் போயிருக்கிறது.

காதலின் தொடக்கமே எதிர்ப் பால் ஈர்ப்பு(கவர்ச்சி) தான். ஆயினும், மகிழ்வான வாழ்வைக் குறிவைத்து தொலைநோக்குப் பார்வையோடு உறுதியான முடிவு எடுத்தால் தவறுகள் நிகழாது.
உள்ளத்தைக் கட்டுப்படுத்தினால்(அதாவது, தீய எண்ணங்களை நினைவூட்டாது) நல்ல முடிவுகளை எடுக்க வாய்ப்புண்டு.
துணைவ(கணவ)னுக்கோ/துணைவி(மனைவி)க்கோ ஊறு விளைவிக்க நினைக்காதிருத்தல் மிகவும் நன்று.
பிறரைக் காதலிக்க ஓமோன்கள் தூண்டினால்; பிறரை விட துணைவன்(கணவன்)/துணைவி(மனைவி) மீது அதிக விருப்பம் கொள்ளுதல் வேண்டும்.
இவைதான் திருமணமான பின்பு வேறு ஆள் மீது காதல் வருவதைத் தடுக்க உதவும்.

இதே போன்று சகோதர உறவுக் காதல் ஒரு எல்லைக்கப்பால் நிறைவான மகிழ்வைத் தராதெனக் கருதுக. அதாவது எதிர்ப் பால் ஈர்ப்பு(கவர்ச்சி) சில நாட்கள் மகிழ்வைத் தரலாம். நிறைவைத் தராமையால் பிறிதொருவரை நாட இடமளிக்கும்.

அகவை(வயது) வேறுபாட்டுக் காதலில் மணமுடித்தவர்களில், முதிந்தவர் பாலுணர்வில் முடங்க மற்றவர் பிறிதொருவரை நாட இடமளிக்கும். பின்னாளில் மகிழ்வற்ற வாழ்வையே களிக்க நேரிடும்.

இங்கு ஆணைவிட பெண்ணுக்கு ஒரிரு அகவை கூடினால் பரவாயில்லை. அதேபோல் பெண்ணைவிட ஆணுக்கு ஐந்தாறு அகவை கூடினால் பரவாயில்லை. எப்படியிருப்பினும் இருபது அகவைக்கு முந்திய ஒருவரை காதலிக்கவோ மணமுடிக்கவோ கூடாது. இருபதாம் அகவையின் பின் உளப்பக்குவமடைந்து மாற்று முடிவுகள் எடுக்க வாய்ப்புண்டு.

எதிர்ப் பால் ஈர்ப்பு(கவர்ச்சி) முலமோ இன்னொருவர் மீது அதிக விரும்பம் கொள்வதாலோ காதலிப்பதை வரவேற்கிறேன். ஆனால், தங்கள் தொலைநோக்குப் பார்வையால் தமது மகிழ்வான வாழ்வை அமைத்துக் கொள்ளுமாறு வேண்டுகின்றேன்.

அதேவேளை, பாலியல் உந்துதலால் பாலியல் தேவைகளை அடைய முனைவோரின் அன்பைக் காதலென நம்பி ஏமாறவேண்டாம். அவர்களுக்கு சுற்றுலா, பொழுதுபோக்கு முக்கியமாகத் தோன்றும். அதெல்லாம் மணமுடித்த பின்னென்றால் அவர்கள் முகம் வாடும். இவர்களுக்குப் பாலியல் தேவைகளை அடையக்கூடிய நிகழ்சி நிரலைத் தவிர வேறெதுவும் வராது. இவற்றை வைத்தே நீங்கள் தப்பித்துக் கொள்ளலாம்.

உளவியல் நோக்கில் காதல் என்று சொல்லி, உண்மைக் காதல் வேண்டும்(காதல் இல்லாத உயிருமுண்டோ?), அதுவும் மகிழ்வான வாழ்வை அமைத்துக் கொள்ளத் துணை நிற்க வேண்டும் என்ற நோக்கில் என் சிற்றறிவுக்கு எட்டிய உளவியல் கருத்துகளை இங்கு விளக்கியுள்ளேன்.

பணம் பண்ணலாம் வாங்க!

பணம் பண்ணலாமோ?
எங்கையப்பா
அரசின்
பணம் அச்சடிக்கும் பொறியைக் களவெடுத்தனி?
பணம் பண்ணலாம் வாங்க என்றதும்
ஆளுக்காள்
இப்படிக் கேள்விக் கணைகளை
என் மீது ஏவிவிட்டனர்!
இத்தனைக்கும்
முகம் கொடுக்க முன்
பணம் பண்ணலாம் வாங்க என்றதும்
என்னைச் சூழ்ந்து கொண்ட
ஆட்களைக் கட்டுப்படுத்த முடியவில்லை!
பணம்
வாழ்க்கைக்குத் தேவை தான்
பணத்தைத் தேடும் வழி தான்
சரியானதாக இருக்க வேண்டுமே!
பணம் அச்சடிக்கும் பொறியை
அறிமுகம் செய்ய
நானொன்றும் பொறியியலாளரல்ல…
பணத்தைத் தேடும் வழியைச் சொல்லும்
மதியுரைஞர்(ஆலோசகர்) என்றதும்
கால் பங்கு கூடியோர்
ஓடி ஒளிந்தனர்!
பணத்தைத் தேடும் வழிகளில்
முதல் வழி கல்வி தான்…
விரும்பிய எல்லாவற்றையும்
கற்றுக்கொள் என்றதும்
கால் பங்கு கூடியோர்
ஓடி ஒளிந்தனர்!
பணத்தைத் தேடும் வழிகளில்
இரண்டாம் வழி சொத்துகள் தான்…
உழைத்த பணத்தை
நெற்காணி, வீட்டு நிலம் என்றும்
வீடுகள், கடைகள் என்றும்
வேண்டிக் கட்டி வைப்பதே என்றதும்
கால் பங்கு கூடியோர்
ஓடி ஒளிந்தனர்!
கல்வியும் தேடியாச்சு என்றாலும்
சொத்துகளும் தேடியாச்சு என்றாலும்
பணத்தைத் தேடும் வழிகளில்
மூன்றாம் வழி தான் முக்கியம்
அது தான்
முதலிரண்டையும்
முகாமைத்துவம் செய்யும் ஆளுமை என்றதும்
எஞ்சிய கூடி நின்றோரில்
அரைப் பங்கினர் ஓடி ஒளிந்தனர்!
பணம் பண்ணலாம் வாங்க என்று
வரச் சொல்லிப் போட்டு
“கல்வியா? செல்வமா? வீரமா?” என்று
திரைப்படமொன்றில சிவாஐி கேட்க
கல்வியும் செல்வமும் இருந்தால் போதாது
அதுகளைக் கையாளத் தெரிவது தான் வீரமென
திரைப்படமொன்றில எம்ஐிஆர் சொன்னதை
சொல்ல வந்திட்டியளே என்று
கூடி நின்ற எஞ்சியோரும்
ஓடி ஒளிய நாலு ஆள் நின்றனரே!
ஏனங்க
நீங்க நாலு ஆளும்
ஓடி ஒளியாமல் நிற்கிறியள் என்றதும்
நாமும் உங்களைப் போன்ற
மதியுரைஞர்(ஆலோசகர்) தானுங்க…
ஏதாவது உதவுங்க;
எல்லோரும்
உங்களைச் சுற்றிக் கூடி நிற்பாங்க…
கட்டிப் பிடிச்சுக் கொஞ்சுவாங்க…
உங்கட நிழல் போல
ஒட்டிக் கொண்டும் வருவாங்க…
ஆனால்
இலவசமாகக் கிடைக்கும்
மதியுரையை(ஆலோசனையை) கேட்க
வரமாட்டாங்கள் என்று சொல்லவே
கால் கடுக்கக் காத்து நின்றோம் என்றனர்!
சொல் திறமை(புத்தி) கேட்காட்டிலும்
தன்(சுய) திறமை(புத்தி) இருந்தாலும் சரி
பட்டுத் தெளிந்தாலும் சரி
ஒவ்வொருவரும் வெல்லலாம் தானே…
மதியுரை(ஆலோசனை) என்பது
ஒவ்வொரு வெற்றியையும்
நம்பிக்கையுடன் விரைவில் பெற
உதவும் பொறி(கருவி) என்று கூறி
நானும் அந்நால்வரும் கலைந்தோம்!

குறிப்பு: உளநல மதியுரை(ஆலோசனை-Counselling) என்பது நோய் நெருங்காமல் முற்காப்பு எடுக்க மட்டுமல்ல, ஒவ்வொரு வெற்றியையும் நம்பிக்கையுடன் விரைவில் பெறவும் பாவிக்கலாம். பிறர் சொல்வதை இடது காதாலே வேண்டி வலது காதாலே வெளியில விடுங்கோ; அதற்குமுன் நன்மை தரும் நல்லெண்ணங்களை மூளையில்(உள்ளத்தில்) பதிவு செய்யுங்கள்.

ஆறுதலுக்கான ஆற்றுப்படுத்தல்

வாழ்வில் தலைநிமிர்ந்தோருக்குத் தான்
பெற்றோரின் பெறுமதி தெரியும்
படித்துப் புகழீட்டியவருக்குத் தான்
படிப்பின் பெறுமதி தெரியும்
வெற்றி பெற்றோருக்குத் தான்
உறவுகளின் பெறுமதி தெரியும்
வைப்பில் வைத்திருந்தவருக்குத் தான்
உழைப்பின் பெறுமதி தெரியும்
கெட்டுப்பட்டு அறிந்தவருக்குத் தான்
பாதிப்பின் பெறுமதி தெரியும்
இழப்புகளை எதிர்கொண்டவருக்குத் தான்
இழப்பின் பெறுமதி தெரியும்
ஆறுதலுக்கான ஆற்றுப்படுத்தல் என்பது
பெறுமதி தெரியாத வரை
நிறைவேற்ற இயலாத ஒன்றே!
தாயை இழந்த பிள்ளைக்கும்
தந்தையை இழந்த பிள்ளைக்கும்
வெவ்வேறு துயர் தான்…
கணவனை இழந்த மனைவிக்கும்
மனைவியை இழந்த கணவனுக்கும்
வெவ்வேறு துயர் தான்…
காதலனை இழந்த காதலிக்கும்
காதலியை இழந்த காதலனுக்கும்
வெவ்வேறு துயர் தான்…
பிள்ளையை இழந்த பெற்றோருக்கும்
உறவுகளை இழந்த உறவினருக்கும்
வெவ்வேறு துயர் தான்…
ஆனால்
வாழ்க்கை என்னும் வட்டத்தில்
பிறப்பும் இறப்பும்
இணைந்திருக்கும் இரண்டே!
இயற்கையை
எதிர்க்க முனைவதை விட
இயற்கையுடன் இசைந்து போவதே
நன்றாயினும்
முயற்சி உள்ள வரை
முயன்று பார்க்கலாம் என்பது
எளிமையான ஆற்றுப்படுத்தலே!
உண்மையை
மூடிவைக்க இயலாதது போல
துயரின் பெறுமதி
பாதிப்புற்றவரின் நலத்தில் தெரியும்…
உள்ளத்தில் இருப்பதை
கொஞ்சம் இறக்கி வைத்தால்
பாதிப்பின் பெறுமதியை
கொஞ்சம் பகுத்தறிய இயலும்…
வாழ்க்கை என்பது
எமக்குத் தரப்பட்ட ஒன்று
அதனை
வேண்டாமென வீசிக்கொள்ள
எமக்கு உரிமை இல்லைப் பாரும்…
இயற்கையுடன் இசைந்து
எமக்குக் கிடைத்த வாழ்வை
அணைத்துக் கொண்டு வாழ்வதே
எமது பணியாக வேண்டும் என்பதே
ஆறுதலுக்கான ஆற்றுப்படுத்தல் என்பேன்!

உளநல மதியுரையும் வழிகாட்டலும் தேவையா?

உளநல மதியுரையும் வழிகாட்டலும் எல்லோருமே செய்கின்றனர். உளச் சிக்கல் ஏற்படின் இதன் மூலம் நலம் பெறலாம். ஆயினும், மருத்துவரை அணுகாமல் இதனை நாடக்கூடாது.
“உள்ளம் என்பது ஆமையடா-அதில்
உண்மை என்பது ஊமையடா” என்ற
பாடல் அடிகளை நினைவு படுத்தினால் உளச் சிக்கலையும் அதற்கான மருந்தையும் அறியலாம்.
ஒவ்வொரு மனிதரும் தமது உள்ளத்திற்கு உள்ளேயே எத்தனையோ இலக்குகளை அடையமுடியாது சந்தித்த தோல்விகளையும் சுமைகளையும் வைத்திருக்கலம். அவற்றை நம்பிக்கையான பிறரிடம் வெளிப்படுத்தாமல்
தமது உள்ளம் கனக்கச் சுமப்பதால் உளநோய்கள் ஏற்பட வாய்ப்புண்டு. இதனைக் கண்டறிந்து உள்ளக் கனத்தைக் குறைக்க உளநல மதியுரையும் வழிகாட்டலும் உதவலாம்.
உள்ளம் என்பது மூளையின் செயற்பாட்டை ஒப்பிடப் பயன்படும் பெயராகும். மூளை நரம்புகள் உடலின் செயற்பாட்டுக்குப் பக்கத்துணையாக இருப்பதால் உளப் பாதிப்புகள் உடல் நோய்களை ஏற்படுத்தவும் தூண்டலாம். எனவே, உளச் சிக்கல்களுக்கு உளநல மருத்துவரை நாடுவதே நல்லது.
மருத்துவரல்லாத பிறரிடம் உளநல மதியுரையும் வழிகாட்டலும் பெற முன் மருத்துவ சோதனைக்கு உட்படுத்தி உளக்குறைபாடு இருப்பதை மருத்துவரால் உறுதிப்படுத்தவும். ஏனெனில், உடல் நோய்களும் உள நோய்களை ஏற்படுத்தவும் தூண்டலாம்.
உளநல மதியுரையும் வழிகாட்டலும் வழங்குவதாகக் கூறும் எவரிடமும் நேரே செல்லாமல் மருத்துவர் குறிப்பிடும் ஒருவரிடம் நாடுவதே நல்லது.
வாய்விட்டுச் சிரித்தால் நோய்விட்டுப் போகுமென்பதில் உண்மை இருக்கு! அதாவது, உளக் கனம் சற்றுக் குறைய புதிய எண்ணங்கள் உள்ளத்தில் புகுவதால் உள மாற்றம் ஏற்படலாம். மேலும், இதற்கு சுய முன்னேற்ற நூல்களும் உதவலாம். தன்னையே தானறிந்து இவ்வடிப்படைக் கருத்துகளை அறிந்தவருக்கு உளநல மதியுரையும் வழிகாட்டலும் தேவையா? உங்கள் பதில்களை இத்தளத்தில் பதிவு செய்யுங்களேன்.

ஏன்? எதற்கு? எப்போது?

ஏன் வழிகாட்டலும் மதியுரையும்?
அறியாத, தெரியாத எதனையும் அறிந்து முன்னேற

எதற்கு வழிகாட்டலும் மதியுரையும்?
இலகுவாக வெற்றியடைய

எப்போது வழிகாட்டலும் மதியுரையும்?
ஏதாவது அறியாத, தெரியாத வேளையில்

வழிகாட்டலும் மதியுரையும் பற்றி…
உள்ளத்தில்(ஆழ் மனத்தில்) இருப்பது தான் நடத்தைகளாக வெளிப்படுகிறது. சில நடத்தை மாற்றங்கள் நோய்களை உண்டாக்கும். எனவே, உள்ளத்தில் நல்லெண்ணங்களைத் தோற்றுவித்து நோய் நெருங்காமல் பேண வழிகாட்டலும் மதியுரையும் உதவுகின்றது. வழிகாட்டலும் மதியுரையும் எமக்குத் தேவையில்ல என்போருக்கு; தாம் தமது உள்ளத்தில் நல்லெண்ணங்களைப் பேணினால் போதும்.